Clausura da Mostra "Coñeces...BIComun?"

Onte clausuramos na Sala Alterarte do campus de Ourense a mostra "Coñeces...BIComun?", que chegou a Ourense ao abeiro da Convocatoria 2012 da Vicerreitoría de Extensión Universitaria de actividades extraacadémicas e de difusión cultural, e inserta no Programa "Coñeces?" que pretende achegar á comunidade universitaria en particular, e a calquera persoa interesada en xeral, o rico patrimonio cultural e natural da cidade de Ourense. 

Esta actividade comezou unha calurosa xornada a principios de setembro co obradoiro BIComunLAB, sobre novos modelos de xestión patrimonial, realizado con alumnado do Grao de Historia e comunidade universitaria, e outras persoas interesadas. A actividade consistiu no deseño do proceso de conservación e xestión patrimonial de dous bens recoñecidos do patrimonio de Ourense. Os bens elixidos polos propios asistentes foron O Castro de Oira e o Cárcere. Os condutores de actividade deron información sobre a situación actual destes bens e coordinaron o traballo colaborativo de reflexión para facer o deseño das intervencións axeitadas en cada caso (Album BicomunLab).

Viñeta del BIComunLAB cos alumn@s da Facultade, o día 3 de setembro

Adela Vázquez e María Masaguer, da Asociación Niquelarte

A  Exposición Coñeces o BIComún? foi inaugurada o 16 de setembro na Sala Alterarte do Campus de Ourense, promovida pola Facultade de Historia e executada pola asociación Niquelarte e a empresa Xeitura, en colaboración cos creativos Xarda e Arispunk (Album da montaxe). O seu obxectivo foi o de afondar na falta de participación cidadá na xestión patrimonial propoñendo esta outra categoría de protección colectiva que xa ocupou a Praza Maior no mes de xullo e que foi presentada ao novo alumnado de Historia anteriormente.

Primeiro Boceto da Exposición Coñeces BIComun? da man de María Masaguer a finais do mes de xuño

Na propia exposición este texto daba a benvida:
Estás a piques de entrar nun espazo que asemella ser pechado, máis se te asomas verás que hai unha forte conexión co exterior. Compilado aberto de termos, conceptos, palabras liberadas, imaxes con memoria, pegadas, documentos visuais e sensibles…

Coñeces BIComún? Esta é só a primeira pregunta: as respostas están no interior da sala, máis tamén en vós mesmos. Nas paredes reflexivas de definicións, máis tamén nos muros que se constrúen na rúa ou na internet. O espazo público mantén unha xanela co espazo en rede. Muros construidos en obradoiros ou muros que tí mesmo poderás construír...

...bicomunicando, bicolaborando, biconstruíndo, bicomún..

Para entender un pouco máis que é BIComun, podedes ver este vídeo.

BIComún by Xarda from Niquelarte on Vimeo.

En setembro se celebrou en Malpartida de Cáceres o SOPA 13 - I Congreso Internacional sobre Socialización del Patrimonio. O día 20, María e Adela presentaban todo o seu traballo sobre o BIComun no #SOPA13.

A equipa decanal da Facultade de Historia de Ourense presentou neste congreso, a experiencia de dinamización do centro, e deste xeito a Facultade de Historia de Ourense tamén quedou enredada na Red sOpA #redsopa, da que xa falaremos. Moitos galegos e galegas neste congreso. De feito, o próximo ano, o Congreso sobre Educación y Socialización del Patrimonio se celebrará por Ourense. 

O balance de todas estas actividades é positivo para nós. A interacción con persoas e ideas abre moitas posibilidades de futuros traballos colaborativos. Pero sobre todo, a satisfacción está en ter conseguido abrir os muros institucionáis a ideas que están na rúa. Por eso, queremos recoller  neste post coas verbas lidas na inauguración da mostra: 

Inauguramos hoxe esta exposición na Sala Alterarte, neste espazo expositivo do campus de Ourense dedicado a amosar as propostas máis innovadoras e ser un espazo creativo e dinámico para a cidade de Ourense, e damos grazas á vicerreitoría por tela cedido para este fin. Este era o marco que dende a facultade de Historia nos pareceu máis adecuado para convidar aos colegas de Niquelarte e Xeitura para montar esta mostra. Unha mostra que sale da rúa e da xente, de xente cunha grande implicación coa cultura, coa herdanza patrimonial e coa sociedade do seu momento. Tamén e xente con grande xenerosidade e vontade de construír. Pero sobre todo, xente capaz dunha grande creatividade e unha grande enerxía, capaz de superar o fastío, a desmotivación ou o desleixo.

Dou grazas a todos os implicados en conseguir permeabilizar hoxe as paredes desta sala e dar a súa esencia ao espazo universitario, como un espazo de libertade intelectual, para a creción e análise de novas ideas, para o descubrimento e o debate, para a invitación a acción.

Permitideme traer as verbas de Ortega cando sinalaba que a principal misión da Universidade é a transmisión da Cultura. Cando afirmaba “Yo haría de una “Facultad de Cultura” el núcleo de la Universidad y de toda la enseñanza superior”.

Hoxe hai moita xente loitando por construir un modelo de “facultade de cultura”, insitucional ou extitucionalmente.

Tamén dicía que “a realidade circundante forma la otra mitad de mi persona”.  O home non é so o home,senón todo o que o rodea, tanto o inmediato como o remoto, tanto o físico, como o histórico ou espiritual.

Aquí traemos unha mostra desa outra parte do mundo que nos constitúe como persoas e a preguntas e respostas de qué queremos facer con esa herdanza. Ese é o obxectivo desta exposición á que os convidamos non so a mirar, senón a participar, nun xeito de bicomunicación.

Grazas especialmente a Adela, a María Masaguer e a Xulio da Asociación Niquelarte, a Martiño Xosé Vázquez Mato de Xeitura e a todas as persoas que fixeron posible que estes muros permeabilicen na universidade o exterior que nos constitúe.

--

A exposición deixa un bo sabor no campus, pero como recolle o blog de Niquelarte, como se trata dunha expo que xorde na rúa, feita de materiais nómadas e reciclables, xa está buscando novos lugares onde chegar. Non queremos gardala e que quede pechada nun almacén; así que a nosa idea é que siga xirando. Quen quere darlle outro pouco de vida nalgunha outra cidade-vila? Parece que na Coruña a xente do Proxecto Cárcere xa se está a animar! ^

-----

Links: 

No DUVI:

3 de setembro de 2013

A Facultade de Historia acolleu este martes un Obradoiro BIComunLAB

Patrimonio público, xestión social

As entidades participantes reivindicaron novos modelos abertos á participación cidadá

http://duvi.uvigo.es/index.php?option=com_content&task=view&id=7530&Itemid=41

Na WeB de Niquelarte

28 agosto

BIComunLAB chega a Ourense

http://niquelarte.org/index.php/gl/novas/item/53-bicomun-obadoiro-ourense/53-bicomun-obadoiro-ourense

2 outubro
Coñeces...BIComun?
http://www.niquelarte.org/index.php/gl/novas/item/55-co%C3%B1eces-bicom%C3%BAn

BIComun na Sala Alterarte. Niquelarte-Praza Pública.

http://niquelarte.prazapublica.com/post/63076903271/bicomun-na-sala-alterarte

Faro de Vigo

Patrimonio, entre lo público y lo privado

Un taller introdujo a los nuevos estudiantes del Grado de Historia en el estado actual de la gestión patrimonial

Natalia Umpiérrez | Ourense 04.09.2013 | 07:56

http://www.farodevigo.es/portada-ourense/2013/09/04/patrimonio-publico-privado/871677.html

La problemática de los bienes en Ourense

04.09.2013 | 07:56

http://www.farodevigo.es/portada-ourense/2013/09/04/problematica-bienes-ourense/871678.html

III Xornadas de Novos Investigadores

Una ano máis, a Delegación de Alumn@s da Facultade de Historia de Ourense en colaboración co centro, organiza as Xornadas de Novos Investigadores na súa III edición, que se celebrará os días 13 e 14 de Novembro de 2013.

Como sinala a propia DAFHO,

...Nestes últimos tempos, tan críticos para a investigación, consideramos que a Universidade debe ser todo un referente en materia de investigación, tanto a nivel galego coma a nivel estatal. Tanto esta nosa Facultade coma o resto de Facultades de Historia, Arte e Xeografía de Galicia posúen uns magníficos investigadores que saíron e/ou están a saír coa licenciatura/grao/master na man dispostos a facerse un oco no difícil mundo da pesquisa histórica...

...O obxectivo principal destas Xornadas é dar o respaldo e o pulo necesario para o coñecemento dos traballos de investigación que se realizaron ou se están realizando nas distintas Facultades de Historia, Arte e Xeografía. Estas investigacións sen dúbida poñen de manifesto a calidade das novas xeracións de investigadores que, tras rematar os estudos de licenciatura, deciden dar un paso mais na súa formación, atinxindo un novo nivel que implica grandes doses de esforzo que se ven materializadas en excelentes investigacións...

...cremos xusto que teñan unha palestra na nosa Facultade onde poidan expor os seus traballos e experiencias na investigación; onde as máis novas xeracións poidan así aproximarse a esta saída profesional, ás veces descoñecida e case sempre solapada pola saída típica da oposición...

Pretendemos así desenrolar unhas xornadas cun marcado carácter interdisciplinar onde todas as áreas da Historia, Arte e Xeografía teñan cabida.

Os requisitos para a participación mediante comunicacións orais son:

- Ter vinculación con algunha Facultade de Historia, Arte ou Xeografía: estudantes grao, de licenciatura ou licenciados non doutorados.

- A temática deberá relacionarse coas distintas áreas da Historia, a Arte ou a Xeografía; podendo ser un traballo de tipo historiográfico, metodolóxico, etc....pero sempre relacionado coa investigación histórica.

- A comunicación oral das distintas investigacións presentadas non deberá exceder os 30 minutos.

- O traballo deberá ir apoiado por algún tipo de material gráfico (Power Point, imaxes, transparencias…).

Deberá enviarse con anterioridade o día 30 de Setembro, un resumo da investigación desenvolvida, nun máximo de 15-20 liñas. O prazo para enviar as propostas a dafho@uvigo.es remata o 30 de Setembro.

Para difundir as xornadas, aquí tedes o seu vídeo promocional, unha divertida visión crítica das dificultades de facer unha investigación nestes tempos.

Agardámosvos!!

Podedes descargar aquí a primeira circular das xornadas.

III Xornadas Novos Investigadores. Bases by Bea Comendador

Coñeces BIComún?

Mañá luns 16 de setembro inaugurase na Sala Alterarte do Campus de Ourense a exposición Coñeces BIComún?, promovida pola Facultade de Historia e executada pola asociación Niquelarte e a empresa Xeitura, en colaboración cos creativos Xarda e Arispunk. Esta mostra da continuidade ao programa “Coñeces?...” iniciado o curso pasado co apoio da Vicerreitoría do Campus de Ourense, co obxectivo de achegar á comunidade universitaria en particular, e a calquera persoa interesada en xeral, o patrimonio cultural e natural inmediato ó campus e mellorar o recoñecemento social destes lugares, activando as engrenaxes para o seu estudio e conservación. Nesta edición, pretende afondar na falta de participación cidadá na xestión patrimonial propoñendo esta outra categoría de protección colectiva que xa ocupou a Praza Maior no mes de xullo e que foi presentada ao novo alumnado de Historia este mes de setembro nas xornadas de orientación.
O concepto mestura o acrónimo de BIC, como Ben de Interese Cultural que é a máxima categoría de protección recollida pola Lei de Patrimonio Cultural de Galicia, co termo PROCOMÚN, definido como aqueles bens que pertencen a todos, que creamos conxuntamente e herdamos para deixar ás xeracións futuras. Da suma de ambos conceptos resulta esta nova categoría.
A mostra estará exposta entre o 16 de setembro e o 11 de outubro.

Punto de Encontro: Facultade de Historia

O próximo luns 2 de Setembro, no salón multiusos (no soto do Edificio de Ferro), se desenvolverá o Acto de Benvida para tod@s @s alumn@s da Facultade e a acollida para os novos alumnos. 

O día 3, se desenvolverá un programa de accións para informar ao alumnado de novo ingreso dos distintos servicios do Campus de Ourense, cun roteiro orientativo polo mesmo. 

Posteriormente daremos inicio a un Obradorio Aberto á comunidade universitaria sobre os novos paradigmas da xestión do Patrimonio Cultural, do que irémosvos informando ao longo destes días. 

Vémonos!! 

http://goo.gl/maps/Ws5vZ

Case van catro anos... (por Adrián Presas Sobrado)

Adrián Presas, da primeira fornada de graduados en Xeografía e Historia pola Universidade de Vigo, deixou no seu muro Facebook esta texto que queremos compartir:

Case van catro anos dende aquel día 21 de setembro de 2009, cando un grupo de mozas e mozos iniciaban o seu camiño nunha auténtica “carreira” que levaba o nome de Grao en Xeografía e Historia.

A dicir verdade, lembro aquel primeiro día coma se fora hoxe. Estaba eu sentado, na primeira fila daquela magna aula 0.9 da que apenas ocupabamos un cuarto da mesma, con Javier Álvarez Batista á dereita e, inmediatamente despois, Pablo Sánchez Martínez. A primeira clase foi de Introdución á Lingua e Literatura Latinas, onde cada vez que un de nós se equivocaba cun caso gramatical, o profesor soltaba un sonoro “no caramba” (García Masegosa, A. 2009). Como esquecer tamén aquela anécdota culinaria na que participaba unha importantísima catedrática de Historia Contemporánea: “el pollo al supositorio” (De Juana, J. 2010) [Os catedráticos tamén teñen pasados escuros…]. Ou o inigualable “carácter nomotético de Vidal de la Blache”, fantasticamente recollido no manual de “Cápel y Urteaga” (Trashorras, E. 2010). Mención aparte merecen as clases daquela materia con título que non preludiaba nada de diversión: Fontes de Información en Humanidades na que, “fundamentalmente” (Vaquero Díaz, B. 2009), andábamos perdidos todos un pouco [Incluso a mestra… Pola túa paciencia. Por saber que as túas materias son un “pouco tediosas”, pero polo ben que transmites: Te queremos Bea!]. Nestas alturas, todo nos parecía “maravilloso, sublime, delicioso, fantástico.” (Barriocanal, Y. 2009).

Acabou primeiro e xa comezamos a ser veteranos. Segundo foi para min o curso máis duro de todos [Espérate a cuarto, Adrián…]. “Fundamentalmente” (Vaquero Díaz, B. 2010), reflexionamos sobre as “mantenzas”: “é que vostedes non se dan conta do que hai detrás dunha pataca?” (Sixirei, C. 2010). Eu estaba preocupado pola carraspeira [que por certo, xa se manifestaba en primeiro], dese profesor ao que lle encantaba meter constantemente cuñas publicitarias sobre Toralla (Pérez Losada, F. 2011). “Os cultivos de inverno e cultivos de verán” (Presedo, A. 2011), acadaron nesta altura unha importancia inimaxinable. Pero sen dúbida, o máis importante, o top dos tops, o trending topic do curso foron “as desigoaldades do espazo mundo producidas polos desequilibrios do sistema centro periferia, que se agrandan polas actividades das grandes transnacionais que actúan en connivencia cos grandes estados nación como son os Estados Unidos o Xapón.” (Bralo Ron, R. 2010)

Entre “patín y patán” (De Uña, E. 2011) chegou terceiro, cunha recén nomeada Decana que, desta vez si, impartía unha materia cun nome que NON daba pé a crear teorías conspirativas (Comendador, B. 2009 – 2011). A nosa imaxe da Idade Media cambiou radicalmente cando nos dixeron, sen ningún tipo de censura, que os lugares nos que vivían os reis eran “cutres, cochambrosos, lugares perdidos de la mano de Dios”, e que certa raíña “dicen las crónicas que no se lavaba, o sea, que era una cerda.” (Rodríguez, F.J. 2011). Os masóns chegaron con forza ás nosas vidas (Valín, A. 2012). Eu dígovos que cando ía pola rúa non podía deixar de mirar cara atrás por se viña algún militar con intencións de realizar un pronunciamento. Os baleirados de prensa, artigos, actas municipais, etc., mesturados coa descolonización e a Guerra Fría (Prada, J. 2012). Nesta altura, debemos citar dúas intervencións míticas. Por orde: “cando se fai un biscoito primeiro hai que facer a masa, montar a nata, decorar o biscoito e, ao final poñémoslle a guinda ao pastel.” (Presedo, A. 2012) [Unha das mellores analoxías que levo escoitado en moito tempo xD]. E por último: “podedes mercar un rotulador indelébel [ou impermeábel, dependía do día], deses que usan os arquitectos xunto cunha escuadra e un cartabón para realizar os vosos mapas e perfís.” (Bralo Ron, R. 2012).

Cuarto… “Fundamentalmente” (Vaquero Díaz, B. 2012): arquivística, optativas, prácticas e TFG, TFG e máis TFG. Saquei unha nova paixón por estas alturas: Latinoamérica (Sixirei, C. 2012).

E con isto, chegou o final. Foron anos que pasaron voando... Creo que foi pola boa compañía. E cito:Pablo Sánchez Martínez, Pablo Cid Couce, Lucia Freire, David Cid, Lidia Seijo, Javi Álvarez Batista,Laura Salgado, Adrián López, María Jesús Requejo. Aos profesores, PROFESIONAIS que transmitiron todo o bo que teñen nesas cabeciñas: Jesús de Juana, Julio Prada, Alberto Valín Fernández, F.J. Pérez Rodríguez (Paco), Bea Vaquero, Carlos Sixirei, Bea Comenda, Yolanda Barriocanal, Elena de Uña, Fermín Pérez Losada, Antonio Presedo, María López, Susana Reboreda, Mercedes Durany, Ladislao Castro.

Esta pequena "homenaxe" (a que agardo non ofenda a ninguén, porque non é esa a intención), creo que recolle ben o que para min foi esta experiencia extraordinaria. A Historia non é só datos e datas. É tamén imaxinación e saber transmitila de maneira certeira. Agora que todo acabou; cando este que escribe é xa "historia" na Facultade de Historia de Ourense, só quero dicir: grazas por enriquecer e compartir comigo estes marabillosos anos.

Grazas.

Aberta inscrición no Máster: Historia Territorio e Recursos Patrimoniais

O próximo venres 28 de xuño estará aberto o prazo de preinscrición no Máster Historia Territorio e Recursos Patrimoniais, ata o 4 de xullo.
Atentos porque hai DUAS BOLSAS da Universidade que hai que solicitar cando a preinscrición.
 
Facultade de Historia de Ourense

Gañadores do Concurso: Dalle Vida ao teu Patrimonio

Dado que o día 18 de abril, foi declarado polo ICOMOS día internacional dos Monumentos e Sitios, a Facultade de Historia de Ourense convocou o I Concurso Fotográfico: Dalle vida ao teu Patrimonio.

Como unha sorte de homenaxe ao día internacional dos monumentos e sitios, na súa faceta patrimonial e educativa, convidamos a participar neste concurso que tivo como obxectivo “revitalizar” o noso patrimonio cultural e arqueolóxico a través da fotografía.

Aquí tedes as fotos gañadoras do concurso, onde figuran monumentos e sitios con xente recreando diversas actividades relativas á vida deses lugares ao longo da súa historia.

Agradecemos á conservadora e restauradora Iria López Baltar, os bonitos cartéis que deseñou para este concurso.

Parabéns e grazas pola  xenerosidade ao enviarnos un anaco de ilusión en forma de foto e texto. Como dia a gañadora... No final da xornada, sempre nos encontramos na terra, a mesma que nos da a vida…

O noso patrimonio estará vivo mentres haxa xente como vós, capaz de divertirse revivindo un instante da nosa Historia... a historia da historia das xentes... a historia con maiúsculas. GRAZAS

E no final da xornada, sempre nos encontramos na terra, a mesma que nos da a vida…

1º PREMIO

Autor: Beatriz Piñeiro Gondar

A captura amosa unha labrega repousando nas ruínas do cemiterio de Santa Mariña do Dozo, Cambados.

Técnica: Captura realizada cunha cámara SONY A390; Distancia focal 18 mm; Configuración de exposición F/22 1/60; Iluminación natural

Procesado de arquivo RAW unicamente de curvas de luces, sombras e contraste.

A aventura de ser neno

1º ACCESIT

Autor: Andrea Rivero González

A fotografía foi realizada na fonte do patio da Casa Museo de Otero Pedrayo. Nela trátase de manifestar a mestura do aspecto lúdico co aspecto da colaboración das pequeñas na tarefas do fogar.

Técnica: Datos Exif Valor F de apertura F5,0; Distancia focal 30.0 mm; Velocidade de obturador 1/320 s.; ISO 100; No flash

No patio, á hora de acomodar

2º ACCESIT

Autor: María Jesús Boo

A fotografía tomada  no patio da Casa Museo de Otero Pedrayo, que outrora foi casa de labranza. Nela vemos a tres nenas no momento de recoller aos animais, dándolles de comer.

Técnica: Datos Exif Valor F de apertura F5,0; Distancia focal: 30.0 mm; Velocidade de obturador 1/52 p.sg.; ISO 100; No flash

Debullando o millo…

3º ACCESIT

Autor: Susana González Rodríguez

Fotografía tomada na eira da Casa Museo de Otero Pedrayo. Nela aparece unha muller nun momento tan emblemático, por usual noutra época, debullando o millo, para darlle como comida aos animais.

Técnica: Datos Exif Valor F de apertura F5,0; Distancia focal: 30.0 mm; Velocidade de obturador 1/320 s.; ISO 100; No flash