A Historia a través das novas tecnoloxías

O campo das Humanidades ten unha longa tradición teórica e metodolóxica que é preciso coñecer de cara á profesionalización, pero ademais, no contexto do século XXI, está a experimentar grandes transformacións. A tecnoloxía da información e das comunicacións provoca grandes cambios tanto no proceso de ensino-aprendizaxe, como no desenvolvemento laboral profesional. Novas metodoloxías, novos contextos na creación e transferencia do coñecemento, e novas profesións que desenvolver. Dedicarse á Historia, a Arte, a Xeografía, ou a todas integradas, procura a satisfacción de diferentes demandas e acádase coa aplicación de novas e diversas metodoloxías que precisan de ser integradas nos plans de estudo pola súa diversidade e complexidade. 

En relación a estes novos campos da “Historia”, o noso centro está a desenvolver un proxecto de dinamización e adaptación da nosa disciplina aos novos escenarios e tempos. Este proxecto está a materializarse a través de organización e difusión de diversas actividades, coas que se pretende visibilizar as distintas facetas profesionais, e o perfil laboral dos estudantes da nosa facultade na sociedade actual, e que son proxectados e compartidas tamén a través dos espazos virtuais, das redes sociais e das plataformas dixitais. Desde xeito, iniciamos no curso 2012-2013 o ciclo A Historia no Medio, difundido a través da canle da UVIGO-TV, para reflexionar sobre o papel de Historia nos medios de comunicación e a construción do discurso.

Entre o próximo 4 e 5 de Abril celebraremos na Facultade de Historia do Campus de Ourense, as II Xornadas do Ciclo A Historia no Medio, que este ano levan por título A Historia a través das Novas Tecnoloxías.

O obxectivo xeral é orientar e informar aos estudantes sobre as posibilidades de desenvolvemento de futuros profesionais no ámbito do diálogo entre as Humanidades e as novas tecnoloxías, visibilizar as potencialidades e favorecer a creación de convenios para o desenvolvemento de prácticas preprofesionáis.

Nos próximos días faremosvos chegar o programa destas xornadas.